مشهد ملهب والإمبراطور من مسرحيّة يعيش يعيش (1969)

مشهد ملهب المهرّب

ملهب: (بيشكرن بحركه، هو وعميتأَمّل الأمبراطور) مين حضرِةْ الأخ؟

هيفا: إسْمو بَرْهوم، بِيشتغِل عنّا بالدكان

ملهب بيتأمل جيبِة الأمبراطور الْـ فيَا ساعه دهب، جنزيرا ظاهر.

ملهب: ساعتَك جَنْزيرا دَهب، مش ساعةِ شغيل

الأمبراطور: إجتني هديَّه

ملهب: دَهَب؟!؟

الأمبراطور:(بِيجَرِّب يشيلا) مقَدَّمِه

ملهب: لا يا أخ. نِحْنا ما مْنِقْبَل هدايا، ولا مْنُنْصُب على الناس

الأمبراطور: شي عَجيب!!

ملهب: شي عَجيب!! لَيْش؟

الأمبراطور: كيف ما بْتُنْصَب، وبْتِسْمَح لَنَفْسَك تْهَرِّب؟

ملهب: النصب شي... والتهريب شي

الأمبراطور: كِلُّو تَعَدّي عَ حقوق الناس

ملهب: هيئْتَك بِتْشارِع، وأنا جايي رُوق. قوم فوت نام

الأمبراطور: (بِعَظَمِه) أنا؟

ملهب: نعم إنتْ

الأمبراطور: مش نِعسان

ملهب: قوم فوت انْعَس ونام

هيفا: ملهب... ما إلَك حق بدِكّانِتْنا. إنتَ ضيف وهوّي ضيف

ملهب: ضيف؟

هيفا: وضارِب مرتو وحمَاتو، ومطلوب

ملهب:مطلوب كَمان؟ فإذن كاسَك (بيشرب وبيسقي الأمبراطور من قنينتو) ما زالَك مطلوب، صرنا زُمَلا، منكمِّل الحديث. قلتلِّي النصب والتهريب كلو واحد؟

الأمبراطور: برأيي نَعَم

ملهب: دخلَك مين مش عَمبِيْهَرِّب؟ اللي بِيْهَرِّب رِبْحو من دَرْب الضرايب مَنُّو مْهَرِّب؟ اللي بِيهَرِّب السِّعر عن البضاعَه مَنُّو مْهَرِّب؟ اللي بْياخُد إشيا غَريبِه عَ بلاد غَريبِه بِشِنَط غريبِه مَنُّو مْهَرِّب؟ كلُّن مْهَرّبين. أنا عَ القليِله بْهَرِّب من دَرْب اللي بَدُّن يْهَربو

الأمبراطور: رأيي إنو إذا كِتْرو اللي بِيخْرْقو الشريعَه، ما بْتِتغَيَّر الشريعه والمخالفِه بِتْضَل مْخالفِه

ملهب: أنا عايش بَرَّات المخالفِه. وْبَعْدين أنا ما بكذِّب. بهَرِّب وبْسَمِّي حالي مهَرِّب. هني بِيهَرّبو، وبيعطو حالُن القاب مهمِّه

الأمبراطور: وليش اختَرْت هالشغلِه؟

ملهب: هيِّي اختارتني. حَمَّلتْني بارودِه وقالتلي امْشي. كان فيْه يومها رجال قاعدين بالشمس وناطرين. وكان فيه ولاد يِلْعبو بالحجار وتْيابُن مخَزّقَه. وكان فيْه عِينَين نِسوان. كِلُّن شَدُّو فيِّي. صِرنا أهل جْرود. وصار عِنّا ضَيعَه لَحالنا، وْولاد ونِسوان يِنْطْرونا ويْصَلّولنا. واللي فيْه ناس بِيصَلّولو ما بِيكُون عَميَعْمِل شي عاطِل

الأمبراطور: فيه كتير بِيعِيشو من هالشغلِه؟

ملهب: ضيعتي كِلا. لو بتْشوف بهالطْوَاق الزغيرِه شو فيْه وْجوْه. خَلْف هالحيطان السّميكِه شو فيه بْواريد. بدُّن ياكلو. بدُّن يعيشو. بدُّن يِبعَتو وْلادن عَ المدرسِه أحلى مَ يِطْلَعوا متلنا

الأمبراطور: رايي إنو الحكومِه مَجبورَه تْعَلّملُن ولادُن

ملهب:الولاد بدُّن يِكْبَرو، ما بيقْدرو يِنطْرو تَ يْصير فيْه حكومِه. كاسَك خَيِّي بَرهوم

الأمبراطور: مَبْسوط بْعيشِةْ التشرُّد يا ملهب؟

ملهب: تْعَوَّدنا عليها. أنا والأمبراطور صِرنا مِتل بَعضْنا. هُوّي مَطلوب وأنا مَطْلوب. بس هُوِّي فيْه عليْه جايزِه

الأمبراطور: إجتني فكرَه: إذا إنتْ حْضيت بالأمبراطور، كيف فيك تْسلّمو وتقبض الجايزِه وإنتْ مَطْلوب؟

ملهب: أنا إذا حْضيت بالأمبراطور ما بْسَلّمو. بْقِلّو فيْه جايزِه ميْه ألف ليرَة للقَبض عليك، بْتِدْفَع خمسين تَ هَرّبَك؟؟؟ كاسَك خيّي بَرْهوم! يا بَرْهوم أنا حَبَّيْتَك. هَيْئتَك مِتْعَلِّم، ولمّا بْتِحْكي بْتِحْكي بْأمر. فيك رجّال. شوف: إنتَ ضارِب مرتَك ومَطلوب. إذا بَدّا تِتْقَل الحالِه عْلَيك، مِستعِد هَرّبَك. ومعي ما حدا بيِمسْكَك. دايما بْهالجبال الموحْشِه، فيْه مَمْرَق لَـ اللي بْترْفُضُن الطرقات الوسيعَه.
(بو ديب بيطلع من الدكّان، معو أركيله)
بيوصل سالم، من رجال ملهب
سالم: مسا الخير (بيلتفت ع الإمبراطور بحذر وبيقول لملهب) شو؟
ملهب: احكيه (بغمزه عن الإمبراطور) صاحبنا
سالم: تِهريبةْ بكرا ترتَّبِتْ: 10 برّادات، 15 غسّاله، 3 لاجئين ساسيّين، 2000 كروز دخّان، تَنكتين من اللي بِعلْمك منن
ملهب: عال. اقعد اشرَب
بو ديب: الله، الله ع إيّام زمان، لمّا كنت أنا هرِّب
ملهب: كنت تهرِّبْ يا بو ديب؟
بو ديب: معلوم. وحياتك ما كنت إرضى إلّا كلّ 100 كلاشينكوف سوا
هيفا: جديّ
بو ديب: بدّك تقول بواريدْ معدّلِه
هيفا: جدّي
بو ديب: جفوتةْ دَكّ. ارتحتي يا جدّي؟؟؟؟؟