مشهد هالة والملك (من مسرحيّة هالة والملك 1967)

 عدد الشخصيّات: 2

(هاله بتضهر بتيابا العتيقه من أوضةْ سهريّه وحامله غراضا)

الملك: (بتيب شحّاد) حسنه لهالشحّاد الله يردّ عنّك

هاله: شِحّاد؟

الملك: نعم يا ستّي شحّاد

هاله: وين الناس الـكانو هون؟

الملك: راحو

هاله: وإنت من وين خلِقت؟

الملك: الشحّاد بيجي ما بيعلن وصولو، بيوصل متل الخَبَر، الشحّاد ما بينوجد إلّا لمّا بيمدّ إيدو ت ياخد من جيبة حدا

هاله: وجايي تشحد بهالليل؟

الملك: وشو فكرك الشحّاد فيه عندو مكتب، بيفتح بالنهار وبيسكّر بالليل؟ أنا شحّاد والرِزقه متل الطير بتمرق على غفله. والليل بيغربل الناس، وأنا بنقّي زبوناتي. البخلا ما بيسهرو، العمّال والشغّيله بيناموا بكّير، وأنا هربان من الفقر. أنا مش فقير، أنا شحّاد. والليل بيخلّي كلّ الناس شحّادين. اللي عم يشحد المحبّه، اللي عم يشحد الفرح، اللي عم يشحد النسيان، والشحاده مخلوطة بالكرم والخير

هاله: وليش ما بتشتغل؟ صحّتك مليحة اسم الله (بتدقّ ع الخشب)

الملك: صحتي مليحة لأني ما بشتغل، وبعدين يلّي بيشتغل بياخد من درب حدا، أنا ما بدّي آخد من رزق حدا، أنا باخد يلّي بيفيض عن حدا

هاله: وليش نقّيت هالساحة وجايي تشحد فيها؟

الملك: الشحّادين بيحبو المطارح الواسعة، ت يرفعو فيها تماثيل

هاله: إنت غريب؟

الملك: الشحّاد دايمًا غريب، بتعرفي ضيعة شحّاد؟

هاله: لأ

الملك: بتعرفي بيت شحّاد؟

هاله: لأ

الملك: الشحّاد متل الملك، كلّ البيوت بيوتو

هاله: الشحّاد متل الملك؟

الملك: وحُرّ متل الملك

هاله: كيف؟

الملك: أنا بنام ع الطريق، بيسترجي الملك ينام ع الطريق؟

هاله: لأ

الملك: الملك قاعد بالنظام/ أنا خارج النظام/ أنا قاعد بالشحاده/ أنا مخلوط بالوحش/ لمّا بدّي إشحد/ بقعد بالشفَقه/ ولمّا بدّي نام/ بنام بالوحش

هاله: أنا وإنت التقينا غريب وغريبه

الملك: إنتي شحّادة كمان؟

هاله: لأ أنا فقيره/ افتكروني أميره/ وصاروا بدّن يجوّزوني الملك

الملك: وليش ما بتاخديه؟

هاله: ما بدّي إكذب عليه

الملك: تجوّزيه واستغليه

هاله: العرّاف قلّي هيك/ والأشراف قالوا هيك/ والمستشار قلّي هيك/ وكلّن كلّن/ وناس الشعب خبّروني إنّو الملك ما بيعرف شو فيه بالبيوت الفقيره. ابوابها واطيه، والملك ع راسو تاج، ما بيقدر يوطّي راسو أحسن ما يوقع التاج. وما حدا بيخبّرو، كلّن بيكذبو عليه

الملك: شِفقت بقلبي ع الملك

هاله: يا ريت بقدِّر فهّمو

الملك: لا بدّ ما يفهم

هاله: منين بدّو يعرف؟

الملك: بيعرف

هاله: (بخوف) إنت بدّك تقلّو؟؟؟

الملك: لأ إنتي قلتيلو

(بيفتح المشلح وبيظهر لباس الملك)