مشهد عودة الملكة والاستقبال (من مسرحيّة ناطورة المفاتيح - 1972)

بداية الحوار في نهاية هذا الرابط

تتمّة الحوار في بداية هذا الرابط

الشخصيّات - عدد 3 ( الملك - الملكة - جاد الحكيم)
استقبال الملكة (ناطورة المفاتيح)

الملكة: يا ملك الزمان/ بعبرّلك عن صدقي بخضوعي/ وعن حبّي برجوعي

الملك: إنتي الفرح الطالع/ نجمةْ المطارح

جاد الحكيم: يا مولاتي انشالله الرحلة كانت سعيده؟

الملكة: الرحلة كانت زهرة العمر لولا الشوق لمولانا الملك

الملك: وكيف حال جلالة أبوكي عمّي الملك صخر الأوّل وجلالة حماتي إمّك الملكة جَلهبار؟

الملكة: بيدعولك بطولة العمر/ بيدعولك بالنصر

جاد الحكيم: وكيف بحيرات الشمس وشواطي الرمل؟ كيف حال الناس بمملكة رُود بلدك الأوّل؟

الملكة: ببلدي الأوّل/ رحبّوا فيي / وقالوا كتير اشتاقوا عليي

(بينسحب جاد الحكيم والحرس بعد الأغنية/ وبيبقى الملك والملكة وحدن)

الملكة: يا سيّد غيبون، شو هالاستقبال الشرشوح؟

الملك: ما تبلّشي! إستقبال رسمي بسبب الظروف

الملكة: لمّا شرّفت أميرة كرمستان عملتلّا اللي ما انعمل، شعب وجماهير وزينه وكلّا قدّ الشبر. ليش؟ بدّك تتشاوف قدّاما. نفخت حالك متل ديك الحبش، بس أنا الملكه، قال شو؟ إستقبال رسميّ

الملك: هيك الاستقبالات: الحاشيه والحرس والملك

الملكة: كلّو مش مهمّ. أنا بدّي الشعب

الملك: هلّق صرتي تحبّي الشعب؟

الملكة: بيعطوا منظر. ليش ما دعيتن؟

الملك: دعيناهن ما إجوا

الملكة: ما إجوا؟ شو السبب؟

الملك: ما بعرف. بعتنا نحقّق بالأمر

الملكة: عقوبات شديده

الملك: شديده

الملكة: (بتقوم) شو هالفوضى؟

الملك: وين رايحه؟ اقعدي خبّرينا ت نشوف

الملكة: تعيانه

الملك: شو؟ بصبصتي كتير بهالرحله؟

الملكة: انخجل. ناسي إنّي ملكه

الملك: الملكه مش ستّ؟ بتلطى تحت هالتاج وبتصير تبصبص

الملكة: هيك كتير. ما بسمحلك تحكي معي هالحكي

الملك: احترميني أنا الملك

الملكة: ملك على غيري مش عليي. شو هالمملكه اللي كلّا غبره! قطيعه! يوسّعوا الشوارع شوي، موكبنا كان تفركش. روح شوف بمملكة بيي الساحات والشوارع

الملك: شو بعملّك؟ بيّك قبض من الإمبراطور حاموش

الملكة: وإنت شو؟ شقفة نهر طاف عندك طرحت الصوت ع الدول. بوابير الطحين اللي أجتك إعانه درّفتها لاولاد خالتك وبعتوها سوا. يا عيب الشوم!

الملك: الشاطر ما يموت.

الملكة: فإذن اعما معروف، لمّا بتجيب سيرة أهلي الملوك حطّ إيدك ع راسك

الملك: فلقتيني بأهلك. أنا ملك إبن ملك. أبوكي تعدّى ع الكار تعدايه. لحدّ هلّق بعدو بيلبس التاج بالقِلب

الملكة: فشرت

(بيفوت جاد الحكيم راكض)

جاد الحكيم: يا أصحاب الجلاله استرونا. وطّوا صوتكن

الملكة: إذا كنت حكيم حكّملو عقلاتو (بتضهر منرفزه)

الملك: شو هيدا؟ شو هيدا؟ بتروح لعند أهلا، بيقضّوها كر كر كر ع راسا بترجع معبّايه. بيقلّي بالي شي ساعة إسحب سفيرنا

جاد الحكيم: من تحت راس حكي؟

الملك: هيدا تدخّل بشؤوني الداخليه

جاد الحكيم: طوّل بالك

الملك: كلّ الحقّ عليك. إنت اللي جوّزتني. إنت اللي علّقتني بهالعلقه.

جاد الحكيم: يا مولانا. جبناها ياها بنت مللمه مستوره. وجلالتكم شفتوها وغشيتو

الملك: إمّها قويّه. إمّها جَلبهار فحّول. لعبتلي بعقلاتي

جاد الحكيم: وجلالتكن موضوع قابل. مواكبكم الملكيّه حفّرت الطرقات. ليليه تاخدو الجيش وتروحو تلفو. اللي بيشوفكن يحسّبكن رايحين ع الحرب

الملك: شفت شفت؟ مليح اللي ما تجوّزت حتّى يضلّ حدا بهالدوله عقلاتو براسو