مشهد الحرامي والشحّاد من مسرحيّة "المحطّة" - (1973)

الشخصيّات عدد 2 (الشحّاد - الحرامي)
الشحّاد: الله، الله، يا كريم يا الله! تذكره لوجه الله الكريم

الحرامي: شو؟ إنت شحّاد؟

الشحّاد: نعم شحّاد

الحرامي: وما عاد يعجبك الشغل هون؟

الشحّاد: هون المناخ أشوب. الناس كسلانين وما إلهن مروِّه يمدّو إيديهن ع جيابن. بالشمال، ع البرد، الواحد إيدو بجيبتو خلقه

الحرامي: يعني جنابك رايح سياحه شحّاديّه؟

الشحّاد: يا أخي صار فيه كتير مضاربات هون. بتلاقي الواحد مش شغلتو، إجا وقِف حدّك ومدّ إيدو. شي بيتعّب الأعصاب. صارو الشحّادين أكتر من محلّات الفراريج، فـ...لازم الواحد من مرّه لمرّه يروح يستجمّ، يغيّر جوّ... تفضّل: عم باخد فاليوم

الحرامي: يعني بفهم من كلامك إنّك ما رح تشحد كلّ هالمدّه. ما هيك؟

الشحّاد: إنّي دور بالشوارع ومِدّ إيدي، لا. ممكن نقِّر تنقير. نقيلي باب مطعم حايد. مِنّو بطيلع، ومنّو بستمخّ ع البرنامج الموسيقي

الحرامي: اسم الله بتحِبّ الموسيقى كمان؟

الشحّاد:الكلاسيكيّه

الحرامي: يا عين

الشحّاد: أنا يوميّه الصبح بقعد تحت هوني شبّاك وبِتسمّع شي ساعة لـ باخ وتشوكوفسكي

الحرامي: عافاك. بس هيدا المطعم الحايد، بعد ما فهمت منشان شو؟

الشحّاد: المطعم الحايد ما بيقصدو إلّا الشخص الضاهر هوّي ووحده بيحبّا. أنا بعرف كيف بستفرد الرجّال وبحشرو قدّام الستّ. ولا يخفاك الأمر الرجّال بيحبّ الكنفشه.

الحرامي: طيّب، وإذا ما دفع

الشحّاد: إذا ما دفع بعلّي صوتي. بخجّلو. ومرّات إذا طنّش بصير نكوزو بإصبعي

الحرامي: يخرب بيتك

الشحّاد: مرّه لحقت هوني زبون. حرقلي قلبي. بالأخير لقطتو بدينتو وبرمتو صوبي

الحرامي: وإذا بعد كل هالشي/ ما دفع؟

الشحّاد: بتكون اللي معو... مرتو

الحرامي: عافاك... قرّب. بتسمع منّي؟ إنت لازم تصير تعرف زبوناتك كلّن مظبوط

الشحّاد: كلّن بعرفن. نصّ خواجات هالبلد بيضهرو مع غير نسوانن. خواجه فيليب مثلًا أنا وياه هيك. بعرفو وبعرف مرتو. بالنهار بيدفع شي، وبس يضهر شي ضهره بالليل بيدفع شي تاني. بدّو الستره. وإذا شي ليله طنّش بصرخلو من بعيد: الله يخلّيلك هالست الحلوه يا خواجه فيليب. رأسًا بيبرم وبيحطّ الخمسه

الحرامي: الله يلقطّني فيك يا خواجه فيليب. طيب ليك: إنت جرّبت تنشل شي مرّه؟

الشحّاد: لا. أنا ما بوسّخ سجلّي العدلي

الحرامي: ولاه ما فيك نضيف إلّا سجلّك، لشو مخلّيه؟ يمّا الظاهر واعدينك بشي وظيفه؟

الشحّاد: أنا إتوظّف؟ أعوذ بالله. شغلتي مزراب دهب

الحرامي: فإذن ليه عم تشحد منّي تذكره؟ ما فيه معك تدفع؟

الشحّاد: مش قضيّةْ ما معي. قضيّةْ مبدا

الحرامي: يا عيني ع المبدا

الشحّاد: عجيب... شكلك حرامي

الحرامي: برافو. كيف عرفت؟

الشحّاد: نحنا بشغلتنا منقوى بعلم النفس. مندرس وجوه الناس هنّي وملهيين. لأنّن ما بيحسبونا شي. منتطلّع فين أكتر ما بيتطلّعو فينا. إنت عيونك عيون حرامي

الحرامي: مش عاجبك الحرامي؟ أنا وإنت زملا. الشحّاد حرامي جبان

الشحّاد: والحرامي شحّاد وقح. تنيناتنا مناخد من جيوب الناس. أنا بمدّ إيدي وباخد، وإنت بتمدّ إيدك وبتاخد.

الحرامي: بس ما تنسى يا أخ، الحرامي بياخد من جياب الناس بالقوّه، يعني بطوله

الشحّاد: والشحّاد بياخد من جياب الناس بالإقناع يعني ... سياسه. صحيح إنت بطل أكتر منّي، بس أنا سياسي أكتر منّك. وتنيناتن السياسي والبطل لازمين لمصلحة الوطن.

(الحرامي بيعطيه تذكره)