 |
| الصورة من حفلة العام الماضي |
أوف أوف أوف
1-لبنان الغالي عليي
إسمك رمز الحريّه
أرز بلادي ما بيركع
بوجود الحكماويي
2- أرز بلادي ما بيركع
خلّي المش سامع يسمع
أرضي اللي باركها الربّ
صورة حلوة بعينيي
3- أرضي اللي باركها الربّ
مش ممكن إلّا تنحبّ
قالت للعالم كلّو
تعلّم هالأبجديّه
4- قالت للعالم كلّو
ولادي مش رح بيفلّوا
بالهويّه معلّقين
الهويّه اللبنانيّه
5- بالهويّه معلّقين
لا منتكسّر لا منلين
كلّ واحد منّا بيقول
يا بلادي اتّكلي عليي
6- كلّ واحد منّا بيقول
لبنان رح يبقى ع طول
أرض الأرز وأرض العِز
وأرض العيشه الهنيّه
7- بأرض الأرز وأرض العزّ
إيماني مش رح يهتزّ
يا أهلي ويا أصحابي
بلادي من السما هديّه
8- يا أهلي ويا أصحابي
يا معلّمتي وأحبابي
كلّ شبر بأرض بلادي
بيسوى مليون وميّه
9- كلّ شبر بأرض بلادي
عم بيصلّي وينادي
يا ربّي بارك لبنان
وساعد هاللبنانيي
***
10- يا ربّي بارك لبنان
ت نعيش بخير وأمان
وبارك مدرستي الحلوة
وخلّيلي إمّي وبيي
11- لبنان عاصمتو بيروت
الملياني شوارع وبيوت
البحر الأبيض قدّملا
من قلبو أجمل ميي
12- با بيي خدني شي نهار
ع بعلبك نعمل مشوار
إتفرّج ع عواميدا
وقلعتها الأثريّه
13- وع البقاع نعمل رحله
وناكل بوظة بزحله
ونتصوّر ع البردوني
مع إمّي وإختي وخيي
14- ويا ماما يلّا ت نزور
الشطّ بصيدا وبحر صور
ونتغدّى بالناقورة
وما نرجع لعشيّه
15- وبدّي ع حريصا زيارة
وعند العدرا بمزيارة
وبدّي نمشي بقنّوبين
ونقعد ناكل بالفيي
16- وع أرز الربّ العالي
لو بطلع، شو ع بالي
بتعرّف على الغابة
وبإهدن السهريّه
17- وع الباروك وأرزاتو
ونبع الصفا وميّاتو
يا ريت منقدر يا ريت
حدّن نقضي الصيفيّه
18- لازم بلبنان نشوف
أرز بشرّي وأرز الشوف
والغابات بتنّورين
وحرج جبال الضنيّه
19- والمتن العالي جبينو
ومتن شمالو ويمينو
هنّي جوهر هالمشوار
وهنّي كلّ القضّيه
20- صار لازم نعرف لبنان
ونحبّو لو شو ما كان
لبنان مش تبّوله وكاس
ولا لحمه وكبّه نيّه
21- لبنان خيي الزغير
بكبر لمّا يصير كبير
أنا بلاقي حالي فيه
حتّى يشوف حالو فيي
22- انكنّك حبّيت ولادك
كرمالن حبّ بلادك
لازم نعرف نحنا مين
هيدي كلّ الخبريّه
23- يا لبنان إنت المعنى
وإنت اللي ساكن معنا
خلّيك بقلبي ع طول
وبفكري وبعينيي
24- خلّيك بقلبي غالي
وراسي بوجودك عالي
الشعب اللي ما عندو أرض
ضايع ميّه بالميّه
25- بوجود الحكماويي
الأرض بتبقى محميّه
هيكي درست بمدرستي
اللي إلها فضل عليي
ليست هناك تعليقات:
إرسال تعليق