الزجل في حفل تخرّج الروضة

زجل للروضة لحفل التخرّج 2015
(فكرة: زينة ناضر - تأليف: ماري القصّيفي)

أوف أوف أوف

1

اليومْ زغار وبكرا كبارْ

رح منضلّ من الشطّارْ

يا مدرستي انبسطي كتير

تلاميذك متلن ما صار

2

يا مدرستي انبسطي كتير

علّمتينا حتّى نطير

بلبنان الحريّه

نحنا جنودو بدنا نصيرْ

3

بلبنان الحريّه

الحكمة أجمل هديّه

نحنا جيل المستقبلْ

رح نهديها غنيّه

4

نحنا جيل المستقبل

بغير الحكمه ما منقبل

فيكِ مندرسْ ومنلعب

وميّةْ سؤال منسأل

5

فيكِ مندرس ومنلعب

ومش ممكن مرّه نتعب

معلّمتي قلبا حنون

لا بتزعل ولا بتعتب

6

معلّمتي قلبا حنون

مع إنّي بعملّا جنون

متل البابا والماما

ع راسي وعيني بتمون

7

بمتل البابا والماما

الدنيي بتحلا إيّاما

بالن طويل عليي

ويا ما عذّبتن يا ما

8

بالن طويل عليي

وقلبن كلّو حنيّه

يا ربّي عمرن يطول

والعيشه تكون هنيّه

9

يا ربّي عمرن يطول

ويضلّو حدّي ع طول

ومنّي يكونو مبسوطين

ت زعّلهن مش معقول

10

منّي يكونوا مبسوطين

بعلامتي الحلوين

وبالنضافة والترتيب

مع رفقاتي المهضومين

11

بالنضافه والترتيب

والشطارة والتهذيب

يا أصحابي ما تخلّوا

هالنصايح عنّا تغيب

12

يا أصحابي ما تخلّوا

دروسنا من راسنا يفلّوا

تعلّمنا الأبجديهْ

ت حروفا معنا يضلّوا

13

تعلّمنا الأبجديّه

ولو كانت صعبه شويّه

كلّو بفضل معلّمتي

اللي تعبت والله عليي

 14

كلّو بفضل معلّمتي

بعد الله وعائلتي

يا مدرستي انبسطي كتير

أحسن مدرسة صرتي

15

يا مدرستي انبسطي كتير

علّمتينا ع التفكير

اليومْ زغار وبكرا كبارْ

ب لبنان القلبو كبير

16

اليومْ زغار وبكرا كبارْ

رح منضلّ من الشطّارْ

يا مدرستي انبسطي كتير

تلاميذك متلن ما صار