مشهد الشخص وبيّاعة البندورة - مسرحيّة الشخص 1968

مشهد الشخص وبيّاعة البندورة

الشخص وبيّاعة البندورة

(مسرحيّة الشخص – 1968)

الشخصيّات عدد 2 (بيّاعة البندورة - الشخص)

بيّاعة البندورة: حضرة الشخص؟

الشخص: مين؟

بيّاعة البندورة: يه!!! إنت بتحكي؟

الشخص: إيه بحكي

بيّاعة البندورة: كنت افتكرتك ما بتحكي

الشخص: لمّا بيكونو الناس كتار ما بحكي. لأنّو كلّ واحد بيفهم على ذوقو. بس لمّا بكون وحدي               بحكي... إيه بحكي

بيّاعة البندورة: معك تديّني ميّة ليرة؟

الشخص: أبدًا... أنا ما معي مصاري

بيّاعة البندورة: حضرة الشخص وما معك مصاري؟

الشخص: أنا صرت المصاري كلّا، والمصاري ما بتحمل مصاري. إنتي مين؟

بيّاعة البندورة: أنا بيّاعة البندورة

الشخص: بيّاعة البندورة؟ قرّبي قرّبي قرّبي. دخلك، بدّي إسألك: ليش من زمان البندورة كانت أطيب               وأرخص؟ حبِّتها كانت أزغر، بس كان إلها طعمه. اليوم، صارت كبيرة وبلا طعمه؟

بيّاعة البندورة: كانت تطله بموسمها وبس. اليوم صاروا يطلّعوها بكل موسم

الشخص: فكرك ع الطرق الاصطناعيه فقدت طعمتها؟

بيّاعة البندورة: ولذّة غيبتها. وما عدنا نتلاقى فيا ونقول: خير السنة ورزق جديد

الشخص: أهلا. إنتي مين؟

بيّاعة البندورة: ما قلتلّك بيّاعة البندورة. بتذكر ساحة الخضره؟

الشخص: إيه إيه ساحة الخضره. مطرح ما استقبلونا وغنّتلنا هاك البنت ورقصولنا دبكه

بيّاعة البندورة: إيه نعم

الشخص: أنا كنت بزماني دبّيك، وكنت إمسك ع الراس على دلعونا

بيّاعة البندورة: على دلعونا على دلعونا / هوا الشمالي غيّر اللونا

الشخص: (بيعمل حركة رقص زغيرة) إيه بس كلّ شي تغيّر

بيّاعة البندورة: والبنت يللي غنتلك يومها زعجتك شي؟

الشخص: أبدًا... أبدًا، طربتني

بيّاعة البندورة: هاك البنت هيي أنا

الشخص: ودفعولك إجرتك يا بنتي؟

بيّاعة البندورة: حاكموني وباعولي العربيّه

الشخص: باعولِك العربيّه؟

بيّاعة البندورة: ومنعوا البيع بالساحة وشرّدوا الخضرجيّه

الشخص: له له له له... ليش؟

بيّاعة البندورة: لأنّو حضرتك بدّك تمرق، سدّوا الطرقات وطردو الناس من الشوارع وسكّروا                          الدكاكين

الشخص: كلّ هالشي لأنّو بدّي إمرق؟

بيّاعة البندورة: نعم

الشخص: له له له له... مع إنّو أنا بتونّس بالناس، وأنا جيت حتّى البيّاعين يبيعو أكتر، الناس                 شغلن يكتر، والبندوره تكبر. ليش عم بيصير هيك؟

بيّاعة البندورة: أنا بعرف

الشخص: شو هالحاله؟ بحكي الكلمه / بعطي الأمر / بيتحرَّف وبيتغيّر / مش عن قصد بيتغيّر/              بس الأمر / بيصير يزورب لحالو / ويعطي أمر لحالو / وبيتغيّر / أنا كمان تغيّرت،                   من زمان كنت صبي زغير شعرو أشقر صار أبيض ع القصّ

بيّاعة البندورة: له له له

الشخص: ما عدت أعرف حالي قدّ ما تغيّرت، قدّ ما غيّروني

بيّاعة البندورة: مين؟

الشخص: كلّن. كلّن. إنتو، هنّي، كلّن. كلّن. بيعتّمولي أوضتي، أنا بحبّ الضو. ليليّه منتشارع.                  مش عم بقدر نام.

بيّاعة البندورة: نام بأوضه تانيه

الشخص: كلّ الأوض فيهن ناس/ يا عمّي منين بيجو؟ / بوسِّع البيت/ بيكترو الناس / أنا ما                   بطلبن / هنّي بيجوا / قاعدين ببيتي / وأنا قاعد فيي الـ مش أنا

بيّاعة البندورة: إنت بتخاف؟

الشخص: ما بخاف إلّا وأنا جايي ع أوضتي / فيه زاروب كبير ضوّو شحيح / مين بيعرف شو                مخبّالو بالزاروب؟

بيّاعة البندورة: قوّي الضوّ

الشخص: الديكوراتور ما بيقبل

بيّاعة البندورة: بتعرف؟ ضوّ البيوت العتيقة كان شحيح

الشخص: فيه ضجر. فيه ضجر. من زمان كان البيت بعامود

بيّاعة البندورة: وكان الولد يقعد ع الشبّاك

الشخص: لأ. كان يزيّح على الحيط، ويلعب ع المقاعد. دخلِك! ليش تغيّرو الناس؟ ما عادوا                    يحبّوا المقاعد. صاروا كلّن بدّن يقعدوا ع الكراسي، وما فيه كراسي تكفّي

بيّاعة البندورة: يقعدوا بالدور

الشخص: ما هوّي الواحد لمّا بيكون تعبان بيقول لرفقاتو رح أقعد شوي، ولمّا برتاح بقعِّد غيري. لكن             مدري كيف، بيتعوّد...

بيّاعة البندورة: إنتَ ما فكّرت تقعِّد غيرك؟

الشخص: مش عن قصد ما فكّرت، بس نسيت... نسيت إنّو فيه غيري وصرت خاف أقعد ع شي              تاني ويصير معي ديسك

بيّاعة البندورة: قصّتك حزينه متل حكايات الشتي

الشخص: إيه قصّتي حزينه متل حكايات الشتي/ بفتكر بمشاكل الناس كلّا / وما حدا بيفتكر                   بمشاكلي

بيّاعة البندورة: تبقى تعا اسهر عنّا. نحنا منعمل سهريّات حلوه، ومنتسلّى بلعب الورق والحزازير

الشخص: يا ريت... يا ريت

بيّاعة البندورة: ليش؟

الشخص: ما بقدر. إسمكن مش مكتوب بدفتر الزيارات (بغضب) لكن أنا مش رح إسمح أبدًا                    يظلموكي يا بنتي. رح أعطي أمر ت يرجّعولك العربيّه ويسمحولكن بالبيع بالسّاحة

بيّاعة البندورة: بس خايفه إنّو تعطي الأمر، ويزورب الأمر، ويعطي أمر لحالو، ويقوم المتصرِّف                      والشاويش يعملولي شي قصّه

الشخص: يعملولِك شي قصّه؟

بيّاعة البندورة: نعم

الشخص: خوّفتيني. أنا إلي زمان ما تنزّهت. هلّق إلي ساعتين عم بتنزّه. خايف بغيبتي يعملولي                  القصّة إلي أنا.

(بيضهر بسرعة هوّي وعم يتلفّت حواليه بحذر)

بيّاعة البندورة: جينا لحلّال القصص / ت نحلّ قصّتنا

               ولقينا في عندو قصّه / يا محلى قصّتنا

               كلّ واحد عندو قصّه / وكلّ قصّه إلها قصّه

               وبيخلص العمر / وما بتخلص القصّه