لماذا هذه المدوّنة؟

إطلاق المدوّنة: 27 تشرين الثاني 2014.
****************
للتذكير: سبق وأنشأنا مدوّنة هذا عنوانها http://arabicsagesse.blogspot.com/

رابط أغنية إنت المعنى (كلمات ماري القصّيفي - لحن روجيه صليبا)

رابط أغنية يا عواميد الحكمة السبعة (كلمات ماري القصّيفي - لحن إيلي الفغالي)

رابط أغنية فوق التلّة الما بتنام (كلمات ماري القصّيفي - اللحن والأداء لنادر خوري)

رابط أغنية يا حكمتنا (كلمات زكي ناصيف - لحن نديم محسن)

رابط أغنية يا عصافير النار (2019 - الصفّ الأساسيّ الثاني C)

رابط أغنية قصّة شادي وكتابو (2019 - الصفّ الأساسيّ الخامس A)

رابط أغنية نسّم علينا الهوا (2019 - الصفّ الأساسيّ الخامس B)

رابط أغنية نقّيلي أحلى زهرة (2019 - الصفّ الأساسيّ الخامس C)

رابط أغنية طيري يا طيارة طيري (2019 - الصفّ الأساسيّ الخامس D)

رابط أغنية أهلا بهالطلّة (2019 - الصفّ الأساسيّ الرابعِ A)

رابط أغنية شدّوا بالصنّارة (2019- الصفّ الأساسيّ الرابع B)

رابط أغنية طلّوا حبابنا (2019 - الصفّ الأساسيّ الرابع C)

الجمعة، 5 أغسطس 2016

مشهد بيّاعة البندورة والخضرجيّه بعد المحاكمة (من مسرحيّة الشخص 1968)


مشهد بيّاعة البندورة والخضرجيه بعد المحاكمة

الشخصيّات - عدد 5 (البيّاع - بيّاعة البندورة - صاحبة الدكّان - الجارة - الدكنجي)

بيّاع: بالمحكمة خبّرينا ع اللي صار
بيّاعة البندوره: شو بدّو يصير / الإنسان انغلب
               صار قلبو الطيّب/ حديد ودهب
               واللي كتبو القوي / ع الناس انكتبْ
صاحبة الدكّان: كان الحكم ضدّك؟           
بيّاعة البندوره: مش ضدّي أنا / ضدّكن إنتو
               لمّا حاكموني / حاكموكن إنتو
              ولمّا شرّدوني / شرّدوكن إنتو
البيّاعين: ما قلتيلن عنّا ولاد؟
بيّاعة البندوره: هنّي بيعرفوا إنّو الناس / ما بيطلعو من الصخر
                والولاد الـ ع الطرقات/ وبيتشيطنوا / هنّي بيعرفوا / إنّو عندن أهل
                وبيرجعوا يسألوهن: ما عندكن أهل؟
                وأهلن نحنا / والمتلنا نحنا
                وما منقدر نبعتهن ع المدارس
                وهيك رح نضل
                نحنا نخلق جيل البيّاعين / وهنّي يخلقوا جيل الحاكمين
البيّاع: فإذن قومو / خلّونا نفلّ / نحمِّل اولادنا ع العربيّات / ويشوفوا الناس رحيل الخضرجيّه/
              وإذا إقدروا يعيشوا بلا خضرجيّه
صاحبة الدكّان: بتروح إنت / بيجي خضرجي غيرك / بيخلق من العازه/ ومن لذّة الشغل
                والطمع بالربح/ وبيوقف ع الرصيف وبينادي ع الخضره
الجارة: نحنا اليوم استعرنا رغيفين خبز / من عند جارتنا ت نعشّي الولاد/ جارتنا جوزا بيشتغل نجّار
        النجّارين أحسن منّا / ما حدا بيلاحقهن / وإذا ما كان فيه شغل / الخشب ما بيدبل / الخضره بتدبل
الدكّنجي: أنا بحب ريحة النشارة وخشب الصنوبر
بيّاعة البندوره: قوس المحكمة خشب وكراسيها خشب
صاحبة الدكّان: بس القضاة بياكلو خضره بياكلو فواكه
بيّاعة البندوره: أنا كنت مفتكره المحكمة شي تاني
الكلّ: خبّرينا عن المحكمة
بيّاعة البندوره: دخلوا الروبات السود / سكتوا الناس / وقفوا الناس
               والميزان ع الشعره / ولا كفّه بترجح
               ناطرين الكلمة / كلمة القاضي
               الحكم أتقل من الصخر / فتحوا الجلسه بإسم الشعب
الكلّ: يعني بإسمنا
بيّاعة البندوره: ساعتا فرحت وقلت / هلّق بيبرّوني
               وقفوا وصاروا يحكوا / انفتحت الدفاتر / وانحكى الحكي
               ولا كلمه وقعت ع الأرض / كلّو وقع بالدفاتر
               وأنا... يا غافل إلك الله / ما بعمري بئذي حدا
              تاري عندي إعدا كتار / لا بعمري شفتن / ولا قشعتن
              وقفوا وصاروا يحكوا ويحتدّوا
              خبّط القاضي ع الطاوله / وقف المدّعي العام / صار يكبّر بالحكي
              ويطلب ت يحبسوني / قال هوّي المشتكي
               ما تاري المدّعي العام / طلِع قرايب الحقّ العام
               ونحنا مفتكرين الرزاله من الشاويش
الكلّ: والنتيجه؟
بيّاعة البندوره: طلع الحكم / والعربيّه رح تنباع بالمزاد العلني
الكلّ: بالمزاد العلني؟

بيّاعة البندوره: إيه بالمزاد العلني

ليست هناك تعليقات:

إرسال تعليق